Санхүүгийн WalletHub вэб сайт, Америкийн мега хотуудын амьдралын чанарын тухай шинэ тайлан гаргасан бөгөөд хэд хэдэн параметраар, хамгийн аз жаргалтай хүмүүс амьдардаг АНУ-ын хотуудыг тодорхойлсныг Travel & Leisure нийтэлжээ.

WalletHub, аз жаргалын 29 үзүүлэлтээр тус улсын хамгийн том 182 хотыг, сэтгэл санааны болон бие махбодийн сайн сайхан байдал, орлого ба ажил эрхлэлт, нийгэм ба хүрээлэн буй орчин гэсэн гурван үндсэн ангилалаар тодорхойлон авч үзэхэд, Калифорниа мужийн Фремонт хот нэгдүгээр байрыг эзэлжээ. Сонирхуулахад,, хамгийн аз жаргалтай арван хотын тав нь, тэр дундаа эхний гурав нь энэ мужид байрладаг байна.

Фремонт хотын оршин суугчид амьдралын сэтгэл ханамжийн хамгийн өндөр түвшинд амьдардаг мөн, гэр бүл салалтын түвшин хамгийн бага байсан нь, гол үүрэг гүйцэтгэсэн хүчин зүйл нь болжээ. Фремонт хот, сард 14 ба түүнээс дээш хоногоор сэтгэцийн хямралд ордог насанд хүрэгчдийн тоогоороо хамгийн бага байв. Мөн өөр нэг гайхалтай статистик нь, Фремонт хот жилд 75,000 доллар ба түүнээс дээш орлоготой өрхүүдийн эзлэх хувиар улсдаа тэргүүлсэн байна.

WalletHub-ын шинжээч Чип Лупо, “Судалгаанаас харахад, орлого нэмэгдэж жилд 75,000 доллар хүртэлх орлоготой болсноор аз жаргалын түвшинг нэмэгддэг, харин түүнээс дээшхи орлого нөлөөлөхөө больж байна . Тиймээс аз жаргалтай амьдралд, зөвхөн орлого төдийгүй боломжийн ажлын цаг, ажилдаа гэр нь ойр байх, цаг агаарын таатай нөхцөл, найрсаг хөршүүд зэрэг нь чухал болох нь харагдсан." гэж бичжээ.

Хамгийн аз жаргалтай арван хотууд:

• Фремонт, Калифорниа
• Сан Хосе, Калифорниа
• Ирвин, Калифорниа
• Сиу Фоллс, Өмнөд Дакота
• Оверланд Парк, Канзас
• Линкольн, Небраска
• Мэдисон, Висконсин
• Скотсдейл, Аризона
• Сан Франциско, Калифорниа
• Хантингтон эрэг, Калифорниа

Харин, аз жаргалын түвшин хамгийн доогуур хотуудад, Кливленд, Детройт, Мемфис оржээ.