Хиймэл оюун ухаан нь, ирээдүйд хорт хавдрыг эмчлэх хамгийн сүүлийн үеийн технологи болж болох нь харагдсан бөгөөд  дэлхийн өнцөг булан бүрт хорт хавдрын эмнэлгүүдэд ашиглах боломжтой гэж  үзэж байгааг NewYorkPost мэдээлэв.

Торонтогийн Их Сургуулийн судлаачид, Insilico Medicine-тэй хамтран Pharma.AI нэртэй хиймэл оюун ухаант эм боловсруулах платформ ашиглан элэгний эсийн хорт хавдар (HCC)-ийн боломжит эмчилгээг гаргахын тулд Chemical Science сэтгүүлд нийтлэгдсэн шинэ судалгааг явуулжээ.

Cleveland Clinic-ийн мэдээлснээр, HCC нь элэгний хорт хавдрын хамгийн түгээмэл төрөл бөгөөд элгэнд хавдар үүсэх үед үүсдэг. Судлаачид, хиймэл оюун ухаанд суурилсан уургийн бүтцийн мэдээллийн сан болох AlphaFold-ийг Pharma.AI-д ашиглаж, өмнө нь мэдэгдээгүй эмчилгээний шинэ зорилтыг олж илрүүлж, уг зорилтод ямар ч тусламжгүйгээр холбогдож чадах "шинэ молекул"-ыг бүтээжээ.

Боломжит эмийг бүтээх ажлыг зорилтот эмийг сонгосноос хойш, Pharma.AI ердөө долоон нэгдлүүдийг нийлэгжүүлэн 30 хоногийн дотор хийж дуусгасан байна. Хоёр дахь удаагийн нэгдлүүдийг судалсны дараа илүү хүчтэй молекулыг олсон боловч аливаа эмийг өргөнөөр хэрэглэхийн өмнө эмнэлзүйн туршилтыг давах ёстой байдаг.

Insilico Medicine-ийн үүсгэн байгуулагч, Гүйцэтгэх захирал Алексей Жаворонков, - "Дэлхий нийтийг урлаг, хэл орчуулгын хиймэл оюун ухааны дэвшилт гайхшруулж байсан. Гэтэл  манай AI алгоритмууд AlphaFold-аас гаралтай бүтэцтэй хүчирхэг зорилтот дарангуйлагчийг бүтээж чадсан" гэж мэдэгджээ.

Химийн салбарын Нобелийн шагналт Майкл Левитт, - "Эмийн туршилтуудын уламжлалт аргууд бүтээх явц нь удаан, алдаа удаан илэрдэг, өндөр өртөгтэй зэргээс судалгааны цар хүрээ хязгаарлагддаг талтай, харин хиймэл оюун ухаан нь эмийг боловсруулах, хөгжүүлэх арга замыг хурдацтай өөрчилж байна. Энэ нь, хиймэл оюун ухаан эмийг боловсруулах үйл явцыг хурд, үр ашигтай, нарийвчлалтайгаар өөрчлөх чадамжийн бас нэгэн нотолгоо болж байна. AlphaFold-ийн урьдчилан таамаглах чадвар болон Pharma.AI Insilico Medicine платформын зорилтот эмийг боловсруулах чадвар хоёрыг хослуулснаар бид хиймэл оюун ухааны тусламжтайгаар эмийн бүтээгдэхүүнийг боловсруулах шинэ эриний босгон дээр ирээд байна." гэсэн байна.

2022 онд AlphaFold нь, хүний ​​бүх геномын уургийн бүтцийг урьдчилан таамаглах замаар хиймэл оюун ухаан болон бүтцийн биологийн салбарт асар том нээлт хийсэн. Хүний ​​биеийн бүх уургийн бүтцийг урьдчилан таамаглахад шинжлэх ухааны шинэ боломжуудыг нээж өгсөн" гэж Insilico Medicine-ийн ахлах эрдэмтэн, гүйцэтгэх захирал Фэн Рэн хэлэв.

“Insilico Medicine нь, эдгээр бүтцийг авч,  өвчний шинэ эмчилгээний, өндөр хэрэгцээтэй эм бүтээх аргуудыг бий болгохын тулд AI платформдоо ашиглах гайхалтай боломж гэж үзсэн. Энэ нийтлэл нь энэ чиглэлийн чухал алхам юм” гэж тэр хэлжээ.

Судлаачид, хиймэл оюун ухаан эрүүл мэндийн салбарт хэрхэн хувьсгал хийж болохыг тайлбарлав: Хими, компьютерийн шинжлэх ухааны профессор Алан Аспуру-Гузик,- "Энэ  нь эрүүл мэндийн салбарын хувьд хиймэл оюун ухааны хөгжүүлэлт нь түүний хэсгүүдийн нийлбэрээс илүү гэдгийг харуулж байна. Хэрэв бид хиймэл оюун ухаанаас гаргаж авсан уураг руу чиглэсэн генерацийн загварыг ашиглавал, бид нөлөөлж болох өвчний хүрээг мэдэгдэхүйц өргөжүүлж чадна. Хэрэв бид үүн дээр нисгэгчгүй лабораториудыг нэмбэл бид хязгааргүй газар нутгийг хамруулах болно." гэсэн байна.

Амьд үлдэх прогноз

JAMA Network Open сэтгүүлд хэвлэгдсэн тусдаа судалгаагаар, Бритиш Колумбын их сургуулийн эрдэмтдийн зохион бүтээсэн хиймэл оюун ухааны систем нь, эмч нарын үзлэгийн үеийн бичилтийг ашиглан хорт хавдартай өвчтөнүүдийн амьд үлдэх, амьдрах хугацааг урьдчилан таамаглах чадвартай болохыг тогтоожээ. Энэхүү загвар нь, хүний ​​нарийн төвөгтэй хэлийг ойлгох чадвартай хиймэл оюун ухааны хэсэг болох Байгалийн хэлний боловсруулалтыг (NLP) ашигладаг. NLP нь, анхны үзлэгийн дараа эмч нарын бичилтэд дүн шинжилгээ хийж, өвчтөн бүрийн хувийн шинж чанарыг тодорхойлж, зургаан сар, 36 сар, 60 сарын амьд үлдэх түвшинг 80% -иас дээш нарийвчлалтайгаар таамаглаж чадсан байна. Энэ загвар нь бүх төрлийн хорт хавдрын үзүүлэлтүүдэд хэрэглэж болдог.

UBC-ийн Сэтгэцийн эмгэг, хорт хавдрын төвийн судлаач, сэтгэл мэдрэлийн эмч,  ахлах судлаач, доктор Жон-Хосе Нунез, - "Хиймэл оюун ухаан нь, зөвлөгөөний баримт бичгийг хүн уншдаг шиг уншдаг. Эдгээр баримт бичигт өвчтөний нас, хорт хавдрын төрөл, эрүүл мэндийн үндсэн нөхцөл, урьд нь хэрэглэж байсан бодис, гэр бүлийн түүх гэх мэт олон дэлгэрэнгүй мэдээлэл байдаг. AI нь, өвчтөний үр дүнгийн илүү бүрэн дүр зургийг гаргахын тулд бүгдийг нэгтгэдэг." гэж мэдэгджээ.

Хорт хавдрын өвчлөлөөс эсэн мэнд үлдэх түвшинг уламжлалт аргаар ретроспектив байдлаар тооцдог бөгөөд эд эсийн төрөл, хавдрын байршил зэрэг цөөн хэдэн ерөнхий хүчин зүйлээр ангилдаг. Харин хиймэл оюун ухааны энэхүү загвар нь хорт хавдрын мэдээлэлд сургагдсан тул, хорт хавдрын өвчлөлөөс эсэн мэнд үлдэх боломжийг урьдчилан таамаглах хүчирхэг хэрэгсэл болж чадна. Эдгээр загварууд нь, сурахад хялбар, дэлхийн хаана ч, өвчтөнүүд хавдрын эмчид үзүүлэхэд сайн суурь болж чадна гэж би бодож байна. Хорт хавдрыг урьдчилан таамаглах нь, хорт хавдрын эмчилгээг сайжруулахад ашиглаж болох чухал хүчин зүйл бөгөөд өвчтөнд эрт тусламж үзүүлэх эсвэл илүү эрчимтэй эмчилгээний сонголтыг санал болгоход тусална. Үүнийг өвчтөнд нэн даруй авах эмчилгээг оновчтой болгох, эмчилгээг хамгийн сайн үр дүнд хүргэхэд ашиглаж болно гэж найдаж байна." гэж Нунес нэмж хэлжээ.