Израилийн эрдэмтэд бидний бие халдвартай хэрхэн тэмцдэг талаарх бидний ойлголтыг өөрчилдөг дархлааны тогтолцооны механизмыг нээжээ. Энэ нь антибиотикийн шинэ ангиллыг бий болгоход түлхэц өгч, одоо байгаа антибиотикт тэсвэртэй супер бактеруудтай тэмцэхэд тусална гэж ВВС бичжээ.

Шаардлагагүй уургийг "дахин боловсруулах" үүрэгтэй эсийн хэсэг нь, бактерийг устгадаг химийн бодисын арсенал үүсгэж чаддаг "нууц горим"-той болохыг эрдэмтэд олж тогтоожээ.

Weizmann хүрээлэнгийн профессор Йифат Мербл, “Бид уурагуудыг жижиг хэсгүүдэд хуваадаг эсийн бүтэц болох протеазомын тухай ярьж байна, ингэснээр тэдгээрийг дахин боловсруулж шинээр бий болгох боломжтой.Туршилтаар протеазом нь эсэд нянгийн халдвар авсан тохиолдолд түүний үүрэг, бүтцийг өөрчилдөг болохыг харуулсан. Энэ нь уурагуудыг нянгийн гаднах бүрхүүлийг эвдэж, устгадаг зэвсэг болгон хувиргаж эхэлдэг. Энэ бол үнэхээр сэтгэл хөдөлгөм амжилт, учир нь бид өмнө нь ийм зүйлийг огт мэдээгүй байсан. Бид нянгийн халдвараас өөрийгөө хамгаалах боломжийг олгодог дархлааны тогтолцооны шинэ механизмыг нээсэн. Энэ нь биеийн бүх эсэд тохиолддог бөгөөд байгалийн антибиотикийн бүхэл бүтэн ангиллыг бий болгодог." гэж ярьжээ.

Судалгааны багийнхан, эдгээр байгалийн антибиотикийг олох үйл явцаа "хогийн саванд шумбах" гэж тодорхойлсон бөгөөд тэд, лабораторийн нөхцөлд үрждэг бактери, уушгины хатгалгаа, сепсистэй хулганууд дээр туршилт хийсэн нь мэдэгдэж байгаа зарим антибиотиктой харьцуулах боломж олгосон байна.

Судлаачид лабораторийн эсийг авч, тэдгээрийн доторх протеазомуудыг унтраахад тэд сальмонелла зэрэг бактерийн халдварт илүү өртөмтгий болж байгааг олж мэдсэн.

Лондонгийн Империал коллежийн байгалийн шинжлэх ухааны тэргүүн, дархлаа судлаач, профессор Даниел Дэвис, “Энэ нээлт нь, бидний бие халдвартай хэрхэн харьцдаг талаарх бидний ойлголтыг өөрчилсөн учраас, "маш их өдөөн хатгаж, сэдэл төрүүлж сэтгэл хөдөлгөсөн үйл явдал болсон. Сонирхолтой нь энэ бол бидний эс дотор байгаа нянгийн эсрэг молекулуудыг үүсгэдэг огт үл мэдэгдэх үйл явц юм. Энэ бол маш чухал бөгөөд гайхалтай. Гэхдээ, энэ нээлт антибиотикийн шинэ эх үүсвэр болж магадгүй ч, туршиж үзэх шаардлагатай хэвээр байна. Энэ төрлийн ажил нь цаг хугацаа шаарддаг " гэжээ.

Антибиотикт тэсвэртэй бактери жил бүр нэг сая орчим хүний ​​аминд хүрдэг. Гэвч, ийм хэрэгцээ шаардлага байгаа ч, шинэ антибиотик бүтээх талаар хангалттай судалгаа хийгдэхгүй байгаа юм. Энэхүү харгис байдлын эсрэг антибиотикийн шинэ эх үүсвэр гарч ирэх нь өөдрөг үзлийн шалтгаан болж байна.

Лондонгийн Кингс коллежийн микробиологийн ахлах багш, доктор Линдсей Эдвардс, үүнийг "боломжит алтны уурхай" гэж нэрлэжээ.

Эдвардс "Бид олон жилийн турш антибиотик хайж байсан. Тэд бидний дотор байсан нь үнэхээр хачирхалтай, гэхдээ тэдгээрийг олох технологитой байх явдал байсан" гэж Эдвардс хэлэв.

Тэрээр эдгээр эм нь аль хэдийн хүний ​​биеийн бүтээгдэхүүн учраас хүмүүст илүү аюулгүй байж магадгүй гэж тэр санал болгож байна.